Xəbərlər
18 dekabr 2023
Bakı Fotoqrafiya Evində 18.12.2023-cü il tarixində “DİALOQ” adlı kukla və foto sərgisi açılmışdır. Sərgidə Gürcüstanın məşhur kukla ustası Baçana Xalvaşinin “Mizantrop” və “Hökmdarlar kitabı” adlı tamaşalarına 1980-ci illərin sonunda hazırladığı marionetlər, eləcə də Bakı Marionet Teatrının “Leyli və Məcnun” tamaşasında istifadə olunan bəzi dekorasiya və dörd marionet kuklası nümayiş olunur. Sərgi Bakı Marionet Teatrının 35 illik yubiley tədbirləri çərçivəsində həyata keçirilir.
28 oktyabr 2023
Bütün 35-illik fəaliyyəti ilə böyük Üzeyir Hacıbəylinin mədəni irsini təbliğ etdiyindən qürur duyan Bakı Marionet Teatrının bir qrup əməkdaşı bu dahi dramaturq və bəstəkara qarşı dərin hörmət və sevgimizin daha bir təcəssümü olaraq onun ev-muzeyini ziyarət etdi.
23 oktyabr 2023
Oktyabrın 10-dan 13-dək “İçərişəhər” Dövlət Tarix-Memarlıq Qoruğu İdarəsinin və Türk Dövlətləri Təşkilatının (TDT) təşkilatçılığı ilə “Yaşanılabilən və Dayanıqlı İrs Şəhərləri” mövzusunda beynəlxalq konfrans keçirilmişdir. Konfrans çərçivəsində Bakı Marionet Teatrında “Təsirlərə davamlı və dayanıqlı İrs Şəhərləri/Abidələri: Mədəni mühitin abidələrin effektiv idarəçiliyi və konservasiyası vasitəsilə canlandırılması” mövzusunda tematik panel təşkil olunmuşdur. Bu böyük tədbirdə iştirakına görə teatr “İçərişəhər”in rəhbərliyindən Təşəkkürnamə almışdır.
11 sentyabr 2023
Hər il sentyabrın ikinci yarısında ölkəmizin hər yerində dahi bəstəkar və dramaturq, dirijor və musiqişünas, publisist və pedaqoq, Azərbaycanın müasir peşəkar musiqi sənətinin banisi olan böyük Üzeyir Hacıbəylinin (1885-1948) doğum günü qeyd olunur. Az öncə teatrın rəhbəri Tərlan Qorçu truppa üzrə assistenti Heyran Qorçu ilə Şuşa şəhərinə – balaca Üzeyirin böyüyüb boya-başa çatdığı, onu yaradıcı dahilik zirvəsinə ucaldan qığılcımların mənbəyi olmuş əfsanəvi diyara səfər etdilər. Səfər zamanı teatrımızın 2024-cü ildə Şuşaya gələrək burada – böyük ustadın döğma yurdunda onun şah əsəri olan “Arşın mal alan”ı nümayiş etdirmək üçün uyğun bir məkan da seçmək mümkün olmuşdur.
4 sentyabr 2023
2-3 sentyabr 2023-cü il tarixlərində “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadənin rəhbərlik etdiyi heyətin Şuşa şəhərinə səfəri baş tutub. Səfər çərçivəsində “İçərişəhər”in nümayəndələri Şuşa Şəhəri Dövlət Qoruğu İdarəsinin rəhbərliyi və əməkdaşları ilə görüşüblər. Görüş çərçivəsində fikir mübadiləsi aparılıb, əməkdaşlıq imkanları müzakirə edilib.
Bakı Marionet Teatrının rəhbəri Tərlan Qorçu ilə truppa üzrə köməkçisi Heyran Qorçu da bu Şuşa səfərində iştirak ediblər. Onlar burada – “Arşın mal alan” kimi əfsanəvi musiqili komediyanın dahi müəllifi Üzeyir Hacıbəylinin doğma diyarında seçim aparıb yerli rəhbərliklə ilkin razılıq əldə edərək, həmin tamaşanı yaxın gələcəkdə Şuşada nümayiş etdirmək üçün uyğun bir məkan tapa biliblər.
