Xəbərlər
8 aprel 2024
Bakı marionet teatrında 8 aprel tarixində keçirilmiş təltifetmə mərasimində Mak’TAB (Tarixi Abidələrin Bərpası Məktəbi) məzunlarına “İçərişəhər” Dövlət Tarix-Memarlıq Qoruğu İdarəsi tərəfindən xüsusi diplomlar təqdim olunub. Təltifolunma mərasiminə qatılan qonaqlar arasında Milli Məclisin üzvləri, Mədəni İrsin Qorunması, İnkişafı və Bərpası üzrə Dövlət Xidməti, Dövlət Turizm Agentliyi Qoruqları İdarəetmə Mərkəzi, Bakı Şəhər İcra Hakimiyyəti, AMEA Arxeologiya, Etnoqrafiya və Antropologiya İnstitutu rəhbər şəxsləri, eləcə də Mak’TAB layihəsinin tərəfdaşları, digər dövlət və özəl qurumların, beynəlxalq təşkilatların nümayəndələri, universitet rektorları, mədəniyyət və ictimai xadimləri olublar.
15 mart 2024
Cenevrədəki “Heritage” Azərbaycan Mədəniyyəti Assosiasiyasının dəvəti və dəstəyi ilə Bakı Marionet Teatrı İsveçrəyə gedir. 2024-cü ilin mart ayının ikinci yarısında Cenevrədə “Les Salons” teatrının səhnəsində “Arşın mal alan” tamaşamızı təqdim edəcəyik. Bundan əlavə, həmin məkan və tarixlərdə “Leyli və Məcnun” adlı tamaşamızın marionetləri və dekorasiyaları sərgi şəklində nümayiş etdiriləcək. Səhnə rekvizitlərimiz İsveçrədən Azərbaycana gətirildikdən sonra Bakıda yenidən tamaşa göstərə biləcəyik – çox güman ki, bu, aprelin ortalarına təsadüf edəcək.
2 fevral 2024
Yaponiyanın altı yüz ildən çox tarixi olan “Noh” teatr sənəti “Gündoğar ölkə”nin ən qədim ifaçılıq nümunəsi sayılır. “Noh” oyunu Azərbaycanda ilk dəfə bu günlərdə Heydər Əliyev Mərkəzində nümayiş etdirildi. Bu möhtəşəm tamaşanı Bakı auditoriyasına Hoşo Kazufusanın rəhbərlik etdiyi Hoşo Teatr Məktəbinin ustaları təqdim etdilər. 2 fevral tarixində isə Hoşo məktəbinin sənətkarları Bakı Marionet Teatrını ziyarət etdilər. Qonaqlar bizim teatrla tanış oldular, “Leyli və Məcnun” tamaşasını seyr edib çox təsirləndilər. Teatrımız Yaponiyada çıxış etməyə dəvət olundu.
18 dekabr 2023
Bakı Fotoqrafiya Evində 18.12.2023-cü il tarixində “DİALOQ” adlı kukla və foto sərgisi açılmışdır. Sərgidə Gürcüstanın məşhur kukla ustası Baçana Xalvaşinin “Mizantrop” və “Hökmdarlar kitabı” adlı tamaşalarına 1980-ci illərin sonunda hazırladığı marionetlər, eləcə də Bakı Marionet Teatrının “Leyli və Məcnun” tamaşasında istifadə olunan bəzi dekorasiya və dörd marionet kuklası nümayiş olunur. Sərgi Bakı Marionet Teatrının 35 illik yubiley tədbirləri çərçivəsində həyata keçirilir.
28 oktyabr 2023
Bütün 35-illik fəaliyyəti ilə böyük Üzeyir Hacıbəylinin mədəni irsini təbliğ etdiyindən qürur duyan Bakı Marionet Teatrının bir qrup əməkdaşı bu dahi dramaturq və bəstəkara qarşı dərin hörmət və sevgimizin daha bir təcəssümü olaraq onun ev-muzeyini ziyarət etdi.
